Точки од интерес – опис

КАЛУЃЕР

Локација: село Рогачево

Надморска височина: 955 м.н.в.

Пристап до местото: Асфалтиран пат кој води до караулата на крајот од селото.

Опис: На само 1 километар од село Рогачево, се наоѓа месноста „Калуѓер“, каде што е и истоимениот извор. На ова место се наоѓа и црквата „Св. Илија“, а истото е и уредено како излетничко место со голем број на маси и клупи. Интересно место за посета во топлите летни денови, за семејни излети и другарување.

GPS: N 42° 09’ 44.11’’ / E 21° 09’ 26.99’’

РОГАЧЕВСКИ КОРИТА

Локација: Шар Планина, над с. Рогачево

Надморска височина: 1475 м.н.в.

Пристап до местото: Земјан пат кој започнува од село Рогачево (за теренски возила)

Опис: Ова место „Корита“, името го добива бидејќи на тоа место има вода, извори, кои се собираат во отворени корита и кои служеле за напојување на добитокот во овој регион. Денес ова место претставува излетничко и викенд место. Во околината изградени се неколку приватни викенд куќички.

GPS: N 42° 10’ 12.36’’ / E 21° 08’ 14.17’’

ПЛАНИНАРСКИ ДОМ “ЉУБОТЕН”

Локација: Шар Планина, над село Старо Село / Љуботен

Надморска височина: 1635 м.н.в.

Пристап до местото: Земјан пат или маркирана планинарска патека од инфо таблата во селото.

Опис: Домот е изграден во 1931 година и е првиот и најстариот планинарски дом во Република Северна Македонија. Веднаш после домот, има букова шума, а посетителите може да уживаат во погледот кон Полошката котлина, врвот Љуботен, местата Козја Стена, Ливадица и Пирибег. Домот нуди сместувачки капацитет за 50 посетители, заедничка трпезариска просторија, кујна и можност да се дегустираат производи од најразновидни традционални рецепти. Со домот раководи Планинарскиот Клуб „Љуботен“ од Тетово. За време на викендите, домот е отворен во текот на целата година, а со претходна најава, функционира и во останатите денови.

GPS: N 42° 11’ 06.14’’ / E 21° 07’ 44.03’’

ВИЛА ЉУБОТЕН

Локација: село Старо Село / Љуботен

Надморска височина: 1600 м.н.в

Пристап до местото: Земјан пат или маркирана планинарска патека од инфо таблата во селото.

Опис: Вила “Љуботен” е приватен сместувачки објект со паркинг место, четири соби, три купатила, две кујни, две трпезарии и еден салон. Тука може да го испиете утринското кафе, уживајќи на терасата со поглед кон врвот Љуботен. Објектот е отворен во текот на целата година за време на викендите, а со претходна најава и останатите денови.

GPS: N 42° 11’ 02.73’’ / E 21° 07’ 37.76’’

ВРАТНИЧКО ЕЗЕРО

Локација: село Вратница

Надморска височина: 655 м.н.в.

Пристап до местото: Земјан пат од село Вратница сé до езерото.

Опис: Вратничко Езеро, претставува вештачко езеро кое е изградено на местото викано „Голина“ во шеесеттите години на минатиот век. Езерото служело за спортски риболов. Околината во минатото била уредена со можности за излети и кампувања. Денес езерото не е во функцијата која ја имало во минатото, но добро е кога веќе посетителот е во близна истото да го посети и да ја доживее панорамата на езерото и врвот Љуботен во позадината.

GPS: N 42° 07’ 17.36’’ / E 21° 07’ 36.23’’

ПЕТАЧКО ВОДИЧЕ

Локација: Село Беловиште

Надморска височина: 860 м.н.в.

Пристап до местото: Асфалтен пат од село Беловиште.

Опис: Над селото Беловиште се наоѓа излетничкото место наречено „Петачко Водиче“. Тука се наоѓа и малото црквиче посветено на Св. Петка и извор на вода која е богата со железо, а за која се верува дека е добра за здравјето на очите. На ова место изградени се места за одмор и подготовка на храна. На само 5 минути над ова место, се наоѓаат неколку мали водопади на Беловишка река, од кој најпознат е т.н. „Вражји вир“. Во близина на излетничкото место, поточно на потегот од селото до тука, се наоѓаат неколку рибници и ресторани.

GPS: N 42° 08’ 43.93’’ / E 21° 05’’ 55.47’’

ВРВ ЉУБОТЕН

Локација: Шар Планина, Љуботен

Надморска височина: 2499 м.н.в.

Пристап до местото: Маркирана планинарска патека од Планинарски Дом Љуботен до врвот.

Опис: Врвот Љуботен е почетната точка на масивот Шар Планина. Како еден од највисоките врвови, се издвојува Шар Планина и претставува најдоминантната точка на целит масив. Еден од најистражуваните и нај искачуваните врвови на Шар Планина. Врвот го карактеризира гребенот кој е едниствен од ваков вид (алпски) на Шара, посебно изразен во зимскиот период.

GPS: N 42° 12’ 24.27’’ / E 21° 07’ 09.39’’

ЛИВАДИЧКО ЕЗЕРО

Локација: Шар Планина, Ливадица

Надморска височина: 2210 м.н.в.

Пристап до местото: Маркирана планинарска патека од Планинарски Дом Љуботен до езерото.

Опис: Ливадичко Eзеро е едно најголемите глацијални езера на Шар Планина, со должина од 228 метри и ширина од 120 метри. Глетката која што посетителите може да ја видат е неговата чиста и бистра вода, а во позадина e доминантниот врв Љуботен. Бојата на езерото е зеленкаста, а таму каде што ја достигнува најголемата длабочина од 7 метри е темно сино. Недалеку од езерото се наоѓа и самиот врв Ливадица, на надморска висина од 2480 м.

GPS: N 42° 11’ 21.88’’ / 21° 04’ 28.77’’

ХОСТЕЛ „КИТКА“

Локација: Село Вратница

Надморска височина: 715 м.н.в.

Пристап до местото: Асфалтиран пат од Тетово до село Вратница.

Опис: Декориран во традиционален македонски амбиент, хостелот нуди сместувачки капацитет од 5 спални соби со по 2 кревети во секоја соба. Во близина на хостелот се наоѓа и ресторан, каде што може да се нарача храна од традиционално македонско мени, а истата се подготвува од домашни органски производи.

GPS: N 42° 08’ 37.18’’ / E 21° 07’ 12.49’’

БЕЛОЈШКИ БИСЕР

Локација: Село Беловиште

Надморска височина: 710 м.н.в.

Пристап до местото: Асфалтиран пат од Тетово до село Беловиште.

Опис: Во центарот на село Беловиште се наоѓа сместувачкиот објект „Белојшки Бисер“, кој нуди сместување во две спални соби со заеднички тоалет. Во близина на објектот се наоѓа и истоимениот ресторан, кој што е познат по подготвување на вкусна риба и со својот традиционален македонски амбиент.

GPS: N 42° 08’ 88.38’’ / E 21° 06’ 17’’